YouTube影片
無人會諗到400年前新宿由一個種辣椒既小小農村，遇到一個又一個既風波同巧合，會發展成日本最繁華既城巿。新宿火車站仲獲列入健力士世界紀錄為全世界一日最多乘客使用既火車站。
新宿點解會成為世界上著名城巿，答案就係隱藏於新宿哩個地方名既背後。
最深日本系列第一集為你介紹，新宿究竟點解會由一個人口稀疏的鄉村發展成吸引全世界遊客既購物天堂和旅遊勝地呢？
新宿400年前荒地一片
這幅係好出名既畫，畫咗200年前新宿一帶啲風景。畫裡面係距離而家JR新宿站70公里，地鐵站中野坂上附近。幅畫度見到新宿仲係一個鄉村。有一條大道，兩旁有幾間屋，係當時哩一帶最旺既地方。哩幅畫名為淀橋水車，淀橋係咩地方來既呢？
出現新宿哩個地名之前，附近一帶叫淀橋，大久保，牛込 。大久保因為有神田川流過，地形屬於低漥地帶，低漥地帶日文稱為KUBO，大遍低漥地帶，大久保，OKUBO哩個地方名用到今日都無變。
牛込係哩一帶歷史最悠久，8世紀已有養牛牧場，搭地鐵大江戶線會經過牛込神樂坂同牛込柳町，以前已有人專登以牛込神樂坂為畫畫題材。而淀橋哩個地名對我地會更切身，淀橋日文發音係YODOBASHI。出新宿站唔遠，你都會發現有幾間大型電器舖YODOBASHI CAMERA。如果你知道點解新宿會有咁多間YODOBASHI CAMERA，你應該新宿哩既專家。
YODOBASHI CAMERA係二戰後喺淀橋既一間小相機店，生意成功發展成大型電器舖,YODOBASHI CAMERA陪住新宿成長。
淀橋水車畫中畫到的那條路，係通去西東京青梅巿既青梅街道，乜乜街道即係江戶時代整理好的大路，商人都會通過哩條進出江戶，來回日本橋和江戶之外各個大城巿。而街道對新宿帶來重大的轉機。
介紹新宿遇到第一個大轉機前，先介紹一下新宿出名既辣椒，日本稱為唐辛子。去食牛丼食烏冬落七味粉入面，材料就有唐辛子。3，400年前開始江戶人都鍾意用來會配蕎麥面食。當時江戶一帶有成3700間蕎麥面家，新宿的唐辛子都好受歡迎，位於新宿五丁目的花園神社都有寫新宿。
現在有Project去宣傳同售賣江戶時代既新宿辣椒架，下次去新宿御園，可能會買到新宿既辣椒。
2大街道通過帶旺新宿
新宿之所以由一個辣椒農村發展成為大城巿，因為1590年新宿遇到第一個轉機。頭先有提到青梅街道，原來仲有一條出名既街道通過新宿，就係連接日本橋同山梨縣甲府市既甲州街道。喺江戶時代，要進出江戶都要經過一道大閘，叫大木戶，大閘係有人把守。
進出江戶要經過甲州街道的閘門係叫四谷大木戶，離而家JR新宿站25分鐘左右的位置。我行到身水身汗，都係為咗睇四谷大木戶哩個遺跡，擺喺十字路口既一個細細地方，全部日本人都行過一眼都無睇，佢地見到我同石碑拍牌，仲以為我係無工作痴咗線添呀，我笑返佢地唔識野，甲州街道全長219公里，由日本橋出發到山梨縣甲府市。
沿住街道，途中都有休息地方，叫做驛，而家日本火車站都會叫做驛。街道的驛站，有舖頭又有客棧，好多人會喺驛站休息甚至渡宿，驛站漸漸就改稱為宿場。宿場同新宿哩個地名有好大關係。
當時，由江戶的中心日本橋出發沿住甲州街道行，第一個宿場係高井戸宿，高井戸宿既一部分係而家京王線既下高井戸站。距離日本橋16公里，實在太遠，當時好多人都不滿，日本橋同高井戸宿中間，離而家JR新宿站唔係好遠既大宗寺附近，開咗一啲店舖畀商人旅客休息，嗰度漸漸成為一個非正規住宿地區。啲人叫哩個非正規臨時住宿地區做內藤宿。
內籘跑馬圍卷獲封新宿
築地內藤哩個名係從何而來既呢？當時大宗寺一帶係一個叫內藤清成既大叔擁有既，哩個大叔係咩來頭，點解內佢會有哩度一帶既地，1590年將軍德川家康，即係當時日本擁有最大實權既人入江戶，叫靚來幫手守住個地頭，話畀塊地畀手下內藤清成，德川家康同內藤清成講，你去淀橋一帶騎馬跑，圍到幾多地方就𧶽畀你啦。
內藤聽到開心到震，即時班隻駿馬係咁跑，圍咗個大圈呀，大成點呢，東至四谷，南至千駄ヶ谷、西至代々木、北至大久保。圍到咁大個地方，內藤好開心到衝去向德川家康會報，德川家康聽到都嚇一跳，見佢咁摶命咁就守承諾封地畀佢。
不過內藤連隻馬跑死左、拜祭内藤一家既多武峯内藤神社裡面。有個駿馬塚係記念哩隻馬，估唔到而家有遺跡可以追返當時既歷史，真係好有趣。
生意人出現集資開發新宿
非正規宿場既內藤宿營運得唔錯，商店客棧生意興隆。但始終都係非正規宿場，就算再旺都好，得唔到將軍批准，係唔能夠擴大經營。以為就咁內藤宿以小規模經營，點不知1697年出現一個貴人。哩個貴人叫高松喜兵衛，佢見到內藤宿有商機，住淺草既高松喜兵衛問問內藤清成既後人不如將大宗寺的非正規宿場搞大佢，升級成為正式宿場啦。
無啦啦走個高松喜兵衛出來，哩位人兄係何方神姓呢？佢係見到另一條街道日光街道附近既千住宿日日人流不絕，佢知道搞宿場好搵錢。就搵幫手集資請求將軍承認內藤宿升級成為正規宿場。將軍開價5600両，如果畀錢既話就畀權你將內藤升級成為正式宿場。高松同內藤家一口答應。究竟5600両即係幾多錢呢？
1両大約而家既13萬YEN，大約1萬港元。5600両即係而家既7億3千萬Yen，約5000萬港元。可以估到當時佢地好有錢，同埋搞宿場係一個大商機可以賺錢。2年後既1699宿場正式開幕，名為內藤新宿，即係內藤地主既新宿場。就係而家新宿哩個地方名既由來。
成人節目發展新宿
築地內藤新宿範圍由四谷大木戶至新宿追分長一公里，四谷大木戶即而家四谷四丁目，另一端既新宿追分即係而家新宿三丁目，伊勢丹百貨對出既十字路口。原來當時既新宿係由伊勢丹百貨為起點，另一面既JR新宿站唔係內藤新宿既一部分。
追分即係兩條街道，青梅街道同甲州街道的分叉口，途人經過哩度都會休息一下，整理行裝。1698年，追分哩度已經有舖頭賣團子。二戰後追分哩個位重開返一間團子舖，希望重現返昔日追分團子既味道，我都專程去買一串最悠久既豉油味。
出咗咁多錢以為宿場會好好賺，點知去到1718年10月，唔夠20年，幕府突然話要內藤新宿收檔。內藤新宿當時有客棧52間，除住宿之外，當然仲有提供特別服務啦，所謂正規同非正規宿場，就係江戶幕府正規範宿場特別服務，以免有傷風紀。宿場賺錢既原因，都係因為商人旅人可以名正言順接受特別服務。
因為當時受幕府限制，唔係度度都可以提供特別服務，內藤新宿有一班女性以服務當地宿客為名，喺內藤新宿打工。佢地叫做飯盛女，裝飯畀旅客食之外，仲陪你過一夜，當時內藤新宿太多飯盛女做生意，搞到治安風紀唔好，所以短短唔夠20年內藤新宿就被迫封檔。
內藤新宿收檔之後，高松家要求重開，就算加碼畀錢畀幕府，不過都未能實現。另一方面，日本橋至高井戸宿距離太遠問題都係無解決。最終喺1772年4月、幕府放緩對另類服務既限制。内藤新宿獲批準重開。忍受咗50年，内藤新宿重拾以往既繁榮。直到明治時代，即19世紀末內藤新宿都好榮華。
踏入明治時代，前年代江戶年代既事物好多都被廢除。內藤新宿因而漸漸荒廃，新宿御園被明治政府用來測試海外進口動植物。內藤新宿一帶已失去昔日既繁華。
20世紀新宿災難重重
明治維新以後，日本邁向現代化，各處都開通鐵路。新宿遇到第三個轉機。明治18年，即1885年，日本鐵道品川線(即而家既山手線)既「内藤新宿駅」落成及投入服務。位置係同而家既新宿站既一部分，係LUMINE EST(ルミネエスト)個位。
當時由内藤新宿站開出既火車只有兩卡，每日只有50個乘客使用。更有資料話内藤新宿站營業第一日係一個乘客都無。2年後既1887年正式改名為新宿駅。以為好順利咁可以發展落去，點知
1923年東京受關東大地震洗禮，大部分地方都被大火燒成焦土。下町區域的淺草和両國等地災情嚴重，但西部地方因為地殻較為穩定災情輕微，好多人都搬去西部既杉並區，世田谷區定住開始新既人生。
上天無捨棄內藤新宿，有天時地利人和。京王線的總站新宿追分駅喺1927年搬到而家既位置。同年小田原急行鉄道亦都投入服務。1927年新宿站成為日本全國1日乘客人數最多既火車站。住世田谷區同杉並區一帶既居民，會搭京王線同小田急線去返。東京巿中心返工同渡過假日。相反，西部經開發後亦有(遊樂場和大自然，東京住民都會去西部玩。
新宿站成為中繼站，乘客人數增加同首都圈人口成正比。但現實冇咁順利，唔夠20年，新宿同以前既內藤新宿遇到同樣既慘痛命運。今次唔係被幕府封檔，而係被美國封檔，新宿受空襲化為焦土。但今次唔使等50年咁耐，戰爭結束後4日，已開始重建。
新宿站附近更出現黑店區，商人喺新宿站南口即而家既回憶橫丁一帶非法攞賣。哩條叫做思い出横丁既小街，就係記念當時哩度係黑店區。到而家哩一帶都有少少昔日黑店區的影子。
全世界最多人使用的新宿站列入健力士記錄大全
築地魚合法非法商業活動令新宿急速重建及發展，當時既國鐵而家既JR，小田急，京王線投入服務80年後既2007年，新宿火車站獲列入健力士世界紀錄大全，係全世界1日最多乘客使用既火車站。
估唔到短短400年，新宿由一個出名種植辣椒既小農村，發展成宿場，經過唔少既成功與挫折。新宿既歌舞伎町，幾間大戲院，西式建築既百貨公司，貫穿新宿中心既大馬路，同埋世界最多乘客使用既超大型火車站，都係同新宿發展有密切關係。
400年前新宿因為係交通樞紐而急速發展，經過封檔，大地震，戰爭既挫折，排除萬難成為國際級大都巿，同世界其他城巿一樣，2020年新宿受疫情洗禮，究竟新宿會點解捱過哩個難關，疫情過去後新宿會有咩躍進呢，大家下次來日本時親眼見證一下，甚至成為支持新宿回復繁榮既一份子。
支持我製作更多日本資訊
京都kevin 主頻道
京都kevin IG
京都kevin Clubhouse
京都kevin Facebook
0 留言